Loco Locass

Loco Locass
Taldekideak burujabetzaren aldeko Journée nationale des patriotes festako partaide batekin.
Datuak
Jatorria	Quebec
Musika mota	rap-hip hop
Urteak	1995 - gaur egun
Produkzioa
Diskoetxea(k)	Audiogram
Taldekideak
Batlam (Sébastien Ricard) Biz (Sébastien Fréchette) Chafiik (Mathieu Farhoud-Dionne)
Informazio gehigarria
www.locolocass.net

Loco Locass 1995ean sortutako Quebeceko rap-hip hop talderik garrantzitsuenetakoa da. Frantses hizkuntzaren defentsan eta Quebeceko burujabetzaren alde irmoki agertzen duten konpromisoagatik ezagunak dira. Quebec Hiriko eta Montrealgo lagun batzuek sortu zuten eta gaur egun azken hiri honetan kokatuta daude.

Sorrera eta kideak

Egungo taldekideek aurretik beste talde batzuetan ezagutu zuten elkar; Biz (Sébastien Fréchette) eta Batlamek (Sébastien Ricard) Koubraüss izeneko "rap esperimental" taldea sortu zuten; geroago Les Locos Loquaces izena hartu zuen. 1999an berriro izen aldaketa egon zen, lehen "Locos Locass" eta azkenik Loco Locass deituz; hirugarren kide nagusia izango den Chafiik (Mathieu Farhoud-Dionne) taldean sartu zen.

Hirukote nagusiaz gain Jeanse, Djip, Lester G, VöV eta Tchi Tchi Novo Solmol ezizenak daramatzaten partaideak ere ditu.

Jarrera politikoa

Soberanistak

Beti agertu dira Quebec independentea izatearen alde; ROC Rap eta Résistance bezalako kantek argi uzten dute taldeak Quebec Kanadarengandik banatzearen alde duen jarrera. 2004an oihartzun handia lortu zuen Libérez-nous des libéraux ("Libera gaitzazue liberalengandik") singlea atera zuten, Jean Charest eta Paul Martinen gobernu liberalen (Quebecen eta Kanadan hurrenez hurren) defenditutako politiken kontra eta Les Zapartistes talde komikoarekin elkarlanean.

Donibane egunean ospatzen den Quebeceko festa nazionalean esku hartu ohi dute.

Arlo sozialak

2005eko neguan Loco Locass Quebeceko ikasle mugimenduak gobernuaren dirulaguntzen mozketen kontra deitu zuen grebaren alde atera zen. 2010eko otsailaren 25ean Chafiik taldekidea herri palestinarraren alde zabaldutako Israelen kontrako boikot kanpaina sinatu zuten Montrealgo 500 artisten artean agertu zen.

Quebeceko jatorriko herrien eskubideen aldeko jarrera ere erakutsi dute; quebectar herria eta herri autoktonoen arteko elkarlana eta denek duten autodeterminazio eskubideak uztartzea defendatu dute. Horretaz ari da La Paix des Braves kanta, Samian anishinaabeg (algonkin) jatorriko rap musikariarekin egin zutena.

Quebeceko kirol nazionala den izotz hockeya ere izan dute gogoan Le but kantan Montrealgo Canadiens taldeari dedikatua.

Diskografia

• Manifestif (2000)
• In Vivo (CD-ROM interaktiboa, 2003)
• Amour Oral (2004)

Bideoak

• Sheila ch'us là (2002)
• Groove Grave (2005)
• Bonzaion (2005)
• Spleen & Montréal (2006)
• La bataille des murailles en symphonique (2006)
• La censure pour l'échafaud (2006)
• La Paix des Braves (Samianekin, 2007)
• M'accrocher (2008)
• Hymne à Québec (2010)
• Le but (2010)

Liburua

• Manifestif beren lehen diskoaren hitzekin egindako ltren bilduma.
• Poids plume: Amour oral eta In Vivo diskoetako hitzak 128 orrialdetako liburua; 2005, Éditions Fides.

Sariak

Bere hitzen kalitateagatik nabarmendu dira eta rap-hip hop munduan musika aldetik ere preziatuak dira; hori dela eta zenbait sari lortu dute:

• Fëlix Saria (Amour Oral, 2005eko hip hop diskorik onena).
• CRIAren urrezko diskoa Amour Oral albumaren 50.000 kopiak saltzeagatik (2005).
• Grafika Sariak: Amour oral diskoaren azalagatik.
• MIMI sariak (hitz eta kantarik onenak) Libérez-nous des libéraux abestiarekin, 2005.
• MuchMusic Video Awards: frantsesezko bideorik onena izateko izendatua, 2005.
• MusiquePlus telebistako hilabeteko artista 2005eko apirilean.

Ikus, gainera

• Hip hop
• Samian

Kanpo estekak

• (Frantsesez) Webgune ofiziala.

• Datuak: Q3257761
• Multimedia: Loco Locass / Q3257761